Rejea Mama

Baina ya siku ya kuzaliwa na ya mauti, binadamu hukumbana na kukabiliana na pandashuka kemkem. Bi. Safari anajua hili fika. Maisha yake yamemwonjesha asali na shubiri kwa wakati mmoja. Analazimishwa ndoa na baba yake aliyemkuza katika maisha ya fimbo mkononi. Kisha ndoa inaingia doa anapokosa kuhimili. Anapovumilia na saburi yake kulipa, anapata mwana kisha dunia inamchukua mtoto wake wa pekee. Ni pigo linalohitaji moyo wa jiwe kustahimili. UCHUNGU WA MWANA na Hadithi Nyingine ni antholojia iliyofum-wa kwa miyaa ya lugha ashirafu na nyuzi za misamiati ya kuhusudi-wa. Imeyamulika waa maisha ya sasa na kuyaweka peupe ya jana na kesho. Visa vyote vimeshiba fani aula na aali zitakazomfanya msomaji kutokinai kwa haraka. Imejumuisha waandishi wenye ukwasi na ustadi kamili wa lugha na wanaoelewa masuala mtambuko na yanayoibuka katika maisha ya sasa. Inajivunia anwani zenye mvuto na maudhui yenye utajiri mkubwa wa lugha na mafunzo. Diwani hii inafunza, inaadibu, inaadili, inaonya na kutahadharisha jamii dhidi ya tamaa, ubinafsi na mambo hasi yanayoikwaza jamii husika. Wahariri wake wameivalia njuga na kuihakiki kwa makini ili kupakulia wasomaji uhondo wa fasihi isiyowekeka chini. Ustadh Kamau na Kaka Fred ni mfano aula wa wahariri mahiri wa fasihi.